"Guac," ars an tunnag, "tha mise math air seinn,"
"Chan eil," ars an ròcais 's e ag èigheach àird a chinn.

"Agamsa tha an guth as fheàrr," ars an coileach-ruadh,
"seinnidh mise tòrr nas àirde," ars a' ghaoth a tuath.

Bha an uiseag bheag ag èisteachd is dh'fhosgail i a beul,
thòisich i ri dùrdail is shìn i mach a sgèith.

Nas binne no nas bòidhche, cha chuala duine beò,
na an ceòl a bh' aig an uiseag 's i seinn gu h-àrd sna neòil.

(Bhon leabhar 'Trealaich is Tuilleadh Trealaich' le Mairead Hulse)