O ho ro hogaidh o, tiugainn còmh' rium an-dràsta
gu ruig bùth Santa Claus, tiugainn leam 's na dèan dàil
tha na sgeilpichean làn 's tha gach nì ann an dòigh
cha bhi airgead a dhìth, 's nach ann ann bhios an spòrs
ann am bùth Santa Claus.

Ann am bùth Santa Claus tha gu leòr dhe gach seòrsa
dhe gach nì bheir toil-inntinn do shean agus òg
tha grìogagan deàlrach is fàinneachan òir
's tha tombac son na bodaich a chumail air dòigh
ann am bùth Santa Claus.

Tha computers nam mìltean a' lìonadh an àite
air am b' eòlach mi fhìn nuair a bha mi nam phàiste
ge b' e cò chuir an gleus inneal uasal an àigh
rinn e fhortan cho cinnteach 's tha mise ga ràdh
ann am bùth Santa Claus.

Ge b' e dè tha nad mhiann, thig ga iarraidh a-null
gu ruig bùth Santa Claus - chan eil nì nach eil ann
sean is òg, beag is mòr bithibh fialaidh san àm
's nuair a thig Là Nollaig bidh ar stocainnean làn
mach à bùth Santa Claus.

(Air fonn 'Bùth Dhòmhnaill 'icLeòid')
(Bhon leabhar 'Trobhadaibh a-steach' le Mairead Hulse)