B' e Peadar Scott am fear-eòlais-nàdair
a b' ainmeil a bha san t-saoghal. B' e mac Caiptean Scott agus dhèanadh
e nì sam bith ris an cuireadh a làmh fìor mhath.
Tha sinn eòlach air na dealbhan bòidheach a rinn e de gheòidh
agus de thunnagan agus 's dòcha gun cuala sinn e air an rèidio
no gum faca sinn e air an telebhisean far an robh e ag innse mu nithean
nàdair ann an dòigh cho sgileil agus cho tlachdmhor. Bha
e na cheannard shoirbheachail air bàtaichean torpedo agus bàtaichean-cogaidh
sa Chaolas Shasannach aig àm an dara cogaidh agus dhealbh e innleachdan
airson falach a chur air
bàtaichean-cogaidh. Bha e na sheòladair sgoth a bha fìor
mhath agus na phoidhleat-glaidhdear cuideachd ach 's ann mar fhear-stèidheachaidh
"Wildlife Trust" ann an Slimbridge faisg air Bristol ann an 1946 as fheàrr
a bhios cuimhne air. Ann an sin tha cruinneachadh gun shamhail de gheòidh
agus de thunnagan far am bi ceudan de iseanan a tha a' dèanamh
imrich a' tighinn gach bliadhna.
B' e Peadar Scott fear-cathrach "World Wildlife Fund" aig a bheil mar chomharradh am panda. Chaidh e air feadh an t-saoghail a' dèanamh a dhìcheall airson toirt air daoine agus air riaghaltais dìon a chur air an àrainneachd agus air beathaichean mar am panda a th' ann an cunnart a bhith air an sgrios. B' e a' chiad neach don deach ridire a dhèanamh (ann an 1973) airson an obair mhòir a rinn e airson dìon na h-àrainneachd.