Ach, dùnaidh bucaidhean air Dihaoine 19 Sultain, agus mar sin, tha an luchd-eagrachaidh a’ brosnachadh an fheadhainn aig a bheil ùidh san tachartas ticeadan a bhucadha dh’ aithghearr gus nach caill iad a-mach. ’S e tachartas a th’ ann far an tèid sgrùdadh air leth farsaing, inntinneach agus lèirsinneach a dhèanamh air eilthireachd Innse Gall.
Thèid co-labhairt trì latha, ‘Saoghal Mòr Farsaing’, a chumail aig Caisteal Leòdhais, Steòrnabhagh, eadar 30 Sultain agus 2 Dàmhair 2025. Tha an tachartas seo ga chur air dòigh le Museum agus Tasglann nan Eilean, a tha mar phàirt de Sgioba Dualchais is Cultair Comhairle nan Eilean Siar, agus thèid beachdachadh a dhèanamh air cuspair eilthireachd Innse Gall bho sreath de sheallaidhean.
Nach lean sibh an ceangal seo airson tuilleadh fiosrachaidh fhaighinn mun Cho-labhairt, agus mar a nì sibh bucadh.
Tha prògram na co-labhairt a’ tabhann beachdachadh farsaing is eadar-mheasgte air eilthireachd – cuspair a tha cho cudromach do eachdraidh nan eilean. Bidh measgachadh de luchd-labhairt à Alba, Canada, Astràilia agus na Stàitean an làthair air a’ chiad dà latha den cho-labhairt. Am measg nan cuspairean sa phrògram, bidh traidiseanan fìdhle ceangailte ri Companaidh Bàgh Hudson, Canada; imrich theaghlaichean thar ùine agus mar a thug e buaidh air pàtran tuineachaidh choimhearsnachdan eileanach ann an Alba Nuadh; dè tha turasachd shinnsireil a’ ciallachadh dhuinne; agus sùil air clàran eilthirich Innse Gall a chaidh a chumail ann am Bhictòria, Astràilia.
Bidh cuid de thaisbeanaidhean ann an Gàidhlig le eadar-theangachadh mar-aon airson riochdairean a bhios an làthair. Bidh seo a’ gabhail a-steach ‘Cànan is cultar na Gàidhlig ann an Alba Nuadh: a’ coimhead air ais, is a’ coimhead air adhart’, agus ‘S e Crìoch Gach Comunn Dealachadh: A’ cur eithireachd nan Gàidheal ann an co-theacsa tron a’ bhàrdachd agus tro na h-òrain aca’.
Am measg nan cuspairean eile a thèid a dheasbad, bidh na traidiseanan beò a tha air an giùlan tro chànan, cultar agus ceòl, tuigse an latha an-diugh air buaidh imrich air eòlas-inntinn dhaoine, Sgeama Imrich Chloinne agus na dàimhean a bha ann ris na Daoine Dùthchasach aig an robh an fhearann a chaidh a thuineachadh leis na Gàidheil.
Thèid am prìomh-òraid a lìbhrigeadh le Àrd-ollamh Marjory Harper à Oilthigh Obar Dheathain, a tha cuideachd na h-ùghdar cliùiteach ’s i air grunn leabhraichean air cuspair diaspora agus eilthireachd na h-Alba a sgrìobhadh.
Air an treas latha bidh cothrom aig riochdairean trì tursan-ionnsachaidh a dhèanamh gu ionadan coimhearsnachd agus làraichean ann an Eilean Leòdhais a tha ceangailte ri eilthireachd, air an cur air dòigh ann an com-pàirteachas le buill Fòram Dualchas Innse Gall.
Faodaidh riochdairean a bhith an làthair gu pearsanta no a bhith an làthair air-loidhne. Bidh measgachadh de luchd-labhairt a bhios ann gu pearsanta agus air-loidhne, a leigeas le daoine bho thall thairis pàirt a ghabhail sa cho-labhairt.
Fhuair a’ cho-labhairt maoineachadh bho Thaighean-tasgaidh is Gailearaidhean na h-Alba agus Comhairle nan Eilean Siar/Oighreachdan a’ Chrùin, le taic-airgid airson an ionaid bho Together Travel.
Thuirt Comh. Coinneach MacLeòid, Neach-gairm Comhairle nan Eilean Siar:
“Bidh Saoghal Mòr Farsaing na thachartas cudromach is fiosrachail, a’ comharrachadh taobh deatamach de eachdraidh an eilein. Innsidh a’ cho-labhairt seo sgeulachd buaidh is dìleab eilthireachd thar ceudan bhliadhnaichean.”
Fiosrachadh mun phrògram iomlan agus mar a nì sibh bucadh.
Thoir an aire: Thathar a’ moladh do riochdairean a dh’fheumas siubhal gu na h-Eileanan Siar airson a bhith an làthair aig a’ cho-labhairt, gun cuir iad siubhal agus àite-fuirich air dòighcho luath ’s a ghabhas gus nach caill iad a-mach air a’ chothrom a bhith ann.
Tha ceangal aig a’ cho-labhairt ris an taisbeanadh Eilthireachd againn ‘Cianalas ’s Dòchas | Homesickness and Hope’ a tha ri fhaicinn an-dràsta aig, an dà chuid, Museum nan Eilean Steòrnabhaigh agus Museum nan Eilean Beinn na Faoghla.
Tha fios-air-ais bho luchd-tadhail a chaidh dhan taisbeanadh air a bhith air leth brosnachail gu ruige seo. Am measg nam beachdan a chaidh a thoirt seachad, tha na leanas:
‘Taisbeanadh air leth tiamhaidh, air a chur ri chèile gu breagha agus gu mothachail.’
‘Chòrd na sgeulachdan a bh’ aig na daoine rium, air an cur ann an co-theacsa eachdraidheil nas fharsainge. Dòigh mhath a bhith ceangailte gu faireachail ris an eachdraidh.’
Agus,
‘’S fheàrr an sgeulachd a bhith air innse tro sgeulachdan dhaoine, chan ann le fìrinnean eachdraidheil a-mhàin. Tha i tarraingeach ann an dòigh fhaireachail, fìor, agus fuirichidh i còmhla rium gu bràth.’
Tha cuid eile air iomradh a thoirt air sgeulachd imrich èignichte chloinne agus clàr-fuaim òrain imrich mar rud gu sònraichte iongantach. Bidh na taisbeanaidhean a’ ruith gu 29 Samhain.