Innsidh Cianalas ’s Dòchas | Homesickness and Hope | Stories of Hebridean Emigration sgeulachdan nan daoine a dh’fhàg cladaichean nan eilean às an dèidh agus cuiridh e cuideam air a’ phàirt chudromach seo de dh’eachdraidh nan Innse Gall.
Tha Museum nan Eilean air a bhith fortanach grunn rudan iongantach fhaighinn air iasad bho Thaighean-tasgaidh Nàiseanta na h-Alba. Tha na h-iasadan seo a’ faighinn taic bho Mhaoin Prògram Iasaid le Ealain Weston. Air a stèidheachadh le Bunait agus Maoin Ealain Garfield Weston, ’s e Prògram Iasaid Weston a’ chiad sgeama maoineachaidh a-riamh air feadh na RA a leigeas le taighean-tasgaidh nas lugha agus taighean-tasgaidh ùghdarrasan ionadail obair ealain is stuthan-ealain fhaighinn air iasad bho chruinneachaidhean nàiseanta.
Bidh na taisbeanaidhean a’ sealltainn stuthan dùthchasach bho Chruinneachaidhean Ameireagaidh Thaighean-tasgaidh Nàiseanta na h-Alba, a’ toirt a-steach brogan-sneachda, bagaichean-teine agus còta Ceannard Inuit. Cha deach na stuthan seo a shealltainn anns na h-eileanan a-riamh, agus tha ceangal inntinneach aig tòrr dhiubh ri neach-malairt bèin às na h-Innse Gall.
Thuirt Ashley Ferrier, Oifigear Chruinneachaidhean Museum nan Eilean,
‘Tha e cudromach gun urrainn dhuinn stuthan co-cheangailte ris na Tùsanaich agus luchd-malairt bèin a bha ag obair ann am Bàgh Hudson a thaisbeanadh anns na h-Eileanan, a bharrachd air nithean co-cheangailte ri mèinneadh òir air feadh an t-saoghail. ’S e sgeulachdan a tha seo nach eil cho aithnichte, agus tha na h-iasadan nàiseanta a’ cuideachadh ann a bhith a’ soilleireachadh agus a’ comharrachadh nan tachartasan eachdraidheil sin.’
Bidh deilbh suaicheanta anns an taisbeanadh cuideachd, air iasad bho Chruinneachadh Fleming-Wyfold, mun chuspair Fhuadaichean nan Gàidheal:
The Last of the Clan le Tòmas Faed
Cha deach an sealltainn anns na h-eileanan airson faisg air 40 bliadhna.
Bidh stuthan eile air iasad a chuidicheas ann a bhith ag innse sgeulachdan eilthirich cuideachd air an taisbeanadh bho Ghrèis-bhrat Diaspora na h-Alba agus Taigh-tasgaidh Mèinnearachd Nàiseanta na h-Alba.
Tro mheasgachadh de stuthan, tasglannan agus sgrìobhainnean, a’ gabhail a-steach nithean cudromach bho na cruinneachaidhean aig Museum nan Eilean fhèin, tha na cuspairean a chaidh a sgrùdadh a’ gabhail a-steach a’ mhalairt-bèin agus rùrachadh, boile an òir, mèinneadh, eòlas boireannaich is imrich chloinne. Bidh na taisbeanaidhean cuideachd a’ beachdachadh air a’ bhuaidh air na Tùsanaich agus mar a chaidh am fearann a thoirt bhuapa.
Thuirt Seònaid Dhòmhnallach, Neach-tasglainn,
‘’S e leabhar-nota sagairt bhon 19mh linn a tha a’ toirt seachad fiosrachadh mu eilthireachd à Uibhist a Deas ann an 1772 aon de na nithean as inntinniche a chaidh a rannsachadh anns na cruinneachaidhean againn. Tha seo a-nis air a ghleidheadhagus air a chur ann an cruth didseatach, agus tha sinn an dòchas gun urrainn dhuinn a chur air-loidhne a dh’ aithghearr, a bharrachd air a shealltainn san taisbeanadh.’
Thuirt Sophia Weston, Leas-chathraiche Bunait Garfield Weston:
“’S e aon de na prìomh amasan aig Prògram Iasaid Weston taighean-tasgaidh a chuideachadh gus sgeulachdan inntinneach innse tro iasadan brìoghmhor a tha a’ buntainn ri dualchas ionadail, agus mar sin, tha sinn air leth toilichte taic a chur ris na taisbeanaidhean seo ann an Lionacleit agus Steòrnabhagh, a bhios a’ toirt cothrom do luchd-èisteachd ùr nithean nach fhacas a-riamh roimhe anns na h-eileanan fhaicinn.”
Tha taic bhon choimhearsnachd cuideachd air a bhith cudromach gus na sgeulachdan mu eilthireachd innse. Fhuair an taigh-tasgaidh tòrr dhealbhan-camara bho na teaghlaichean is sliochdan an dèidh dhuinn iarrtas a chur a-mach air an son. Cha ghabhadh ach àireamh bheag dhiubh a ghabhail a-steach san taisbeanadh, ach bidh mòran a bharrachd rim faighinn ann an earrann ùr air an làrach-lìn againn.
Bidh na taisbeanaidhean ann aig Museum nan Eilean, Lionacleit, agus aig Museum nan Eilean, Steòrnabhagh, air gu 29mh Samhain 2025.
